Ghazal

"aashiq hue the jo kahin rusvaa nahin huun main main mar gayaa huun aap pe zinda nahin huun main kyaa be-khudi mein khidmat-e-mai-khaana ho sake pir-e-mughaan se taalib-e-sahbaa nahin huun main saaqi hanse hai kyaa mujhe do-tin de ke jaam pi kar khum-e-sharaab hi bahkaa nahin huun main kyaa ghaT ke laaghari se haqiqat mein baDh gayaa nazron mein jo kisi ki samaataa nahin huun main 'aarif' mire kalaam ko insaaf kar ke dekh fann-e-sukhan mein ham-sar-e-‘saudaa’ nahin huun main"

"hovein bar-aks bhalaa kyuun na vo aghyaar se khush kisi maashuq ko dekhaa na vafaadaar se khush har duaa par hamein dushnaam mayassar hai kahaan shaamat-e-nafs hai gar hovein na sarkaar se khush naqd-e-dil bhi jo koi de ke na maange bosa vo huaa karte hain bas aise kharidaar se khush ghaur se main ne jo dekhaa to kahin aalam mein koi hogaa na ziyaada tire bimaar se khush kyaa ajab mujh se khafaa hove agar vo 'aarif' kisi maashuq ko dekhaa na vafaadaar se khush"

"vahshat mein yaad aae hai zanjir dekh kar ham bhaagte the zulf-e-girah-gir dekh kar jab tak na khaak ho jiye haasil nahin kamaal ye baat khul gai hamein iksir dekh kar uzr-e-gunaah daavar-e-mahshar se kyuun karun gham miT gayaa hai naama-e-taqdir dekh kar huun tishna-kaam-e-dasht-e-shahaadat zi-bas ki main girtaa huun aab-e-khanjar-o-shamshir dekh kar 'aarif' chhupaa to ham se vale ham to paa gae jo baat hai ye rang ki taghir dekh kar"

"na gilaa tujh se na kuchh hai falak-e-pir se ranj jo pahunchtaa hai so mujh ko miri taqdir se ranj ho gai is se sivaa maut ki jaldi se khushi jis qadar ham ko huaa thaa tiri taakhir se ranj shab ko ghabraa ke vo ulTe gae aghyaar ke ghar un ko kyaa mujh ko huaa aah ki taasir se ranj ham se har roz ulajhnaa jo yahi hai us kaa ho ke rah degaa tiri zulf-e-girah-gir se ranj surkh-ru ham ko rakhaa be-asari ne 'aarif' us ko pahunchaa na kabhi naala-e-shab-gir se ranj"

"sar jo rahtaa hai miraa rone se aksar bhaari paanv par rakhtaa nahin un ke samajh kar bhaari be-takalluf harakat kuchh jo falak kartaa hai aaj-kal mujh pe sitaara hai muqarrar bhaari ghair ke saamne yuun mujh pe yakaayak na uThe dast-e-naazuk mein tere kaash ho zevar bhaari aur kuchh hain tire dil-band ke tevar ba-khudaa aaj ki raat har ik but ko hai aazar bhaari apne ghar mein hai mujhe roz musibat 'aarif' tiin din gor mein hote hain muqarrar bhaari"

"jahaan se dosh-e-azizaan pe baar ho ke chale ye su-e-mulk-e-adam sharmsaar ho ke chale hamaare dekhne ko khush abhi se hain aadaa zaraa na dekh sake ashk-baar ho ke chale pahunch hi jaaoge mai-khaane mein khizar tum bhi hamaare saath jo yaaron ke yaar ho ke chale tumhaari rah kaa rahaa ham ko har taraf dhokaa chale jidhar ko so be-ikhtiyaar ho ke chale sanaa-nigaar ye hai kis ke khalq kaa 'aarif' qalam varaq pe na kyuun ashk-baar ho ke chale"

"kyaa karegi ye tiri kaakul-e-paimaan meraa haal kuchh is se bhi afzun hai pareshaan meraa paas aane bhi na deve kabhu parvaane ko dekh le haal agar sham-e-farozaan meraa ji mein hai dekhiye mar kar bhi ki kyaa hotaa hai jite-ji tak to na niklaa koi armaan meraa shukr sad-shukr ki tum aae ho mere ghar mein aaj aabaad huaa khaana-e-viraan meraa rukh-e-jaanaan kaa jo rahtaa hai tasavvur 'aarif' kaukab-e-bakht hai ye dida-e-hairaan meraa"

"ki mere taDapne ki na tadbir kisi ne us ki na dikhaai mujhe tasvir kisi ne khaanon se manon gham ke bhi seri nahin hoti kyaa mujh ko khilaa di kahin iksir kisi ne ye kohkan-o-qais yunhi mar gae aakhir dekhi na kabhi aah ki taasir kisi ne shaad us nigah-e-yaar ke dhoke mein huaa huun maaraa hai mere siine mein jab tiir kisi ne ye rekhta vo hai ki koi Dhaa nahin saktaa 'aarif' kahin dekhi hai ye taamir kisi ne"

"kyaa ghazab hai ki miraa mujh se vo dilbar toDaa mujh pe kyaa tu ne sitam charkh-e-sitamgar toDaa sakht-jaanon ko jalaane ke sivaa kyaa tadbir muft kyuun qaatil-e-saffaak ne khanjar toDaa aa gayaa vaan jo kisi ke lab-e-shirin kaa khayaal jaam-e-kausar ko uThaa kar lab-e-kausar toDaa uTh gayaa chal ke tire dar se main go kaaba ko par ye zunnaar vahaan bhi but-e-kaafar toDaa kyaa dar-e-yaar-e-talab pahunche hain insaan 'aarif' us ke darbaan ko udhar de ke bahut zar toDaa"

"aah ko jo kahun buraai ki bakht ne kaun si rasaai ki mehrbaan vo hue to hairaan huun un se kyaa main ne bevafaai ki us ke raf-e-gumaan-e-bad ke liye muddaton ham ne paarsaai ki zoaf mein sar hilaa na baalin se go bahut taaqat-aazmaai ki sab se begaana ham rahe 'aarif' dosti ki na aashnaai ki"

"hain ham bhi khuub chaah kaa saamaan kiye hue baiThe hain ghar ko pahle hi viraan kiye hue dhoke mein aa ke baagh-e-jahaan mein chale gae dil mein gumaan-e-kucha-e-jaanaan kiye hue baiThaa huun roz-e-hijr mein har ik ghaDi pe main azm-e-shumaar-e-reg-e-bayaabaan kiye hue paas un ko rahve apne jo naamus-o-nang kaa ham bhi phireinge chaak garebaan kiye hue 'aarif' bataa ki sar hai ye kis din ke vaaste phirtaa hai aaj tegh vo uryaan kiye hue"

"tadbir mein yaaro nahin taqsir tumhaari taqdir miri ho gai tadbir tumhaari kyaa mar gae zindaan mein asiraan-e-mohabbat aavaaz nahin deti hai zanjir tumhaari tum aan ke samjhaao mire dil ko to shaayad kar jaae nasihat koi taasir tumhaari rahti hai pareshaan jo saraasar ye hamesha kis pech mein hai zulf-e-girah-gir tumhaari jab daad-e-sukhan milti tumhein hazrat-e-'aarif' suntaa jo ghazal aaj ko ye 'mir' tumhaari"

"qaail bhalaa hon naama-bari mein sabaa ke khaak phirti hai vo bhi galiyon mein aksar uDaa ke khaak kahtaa huun soz-e-dil se ki kar chuk jalaa ke khaak ek baat par jo yaar ne jaani uThaa ke khaak kyaa kaanptaa hai naala-e-sozaan se ai falak jab baat thi ki mujh ko kiyaa ho jalaa ke khaak paani nikal ke dasht mein jaari hai jaa-ba-jaa yaa-rab gayaa hai kaun ye sar par uDaa ke khaak daaman uThaa uThaa ke jo bachtaa huaa chalaa kyuun hovein mar ke kuche mein is bevafaa ke khaak rizvaan abir-e-khuld se badlun na zinhaar khushbu hai kuche mein vo mire mah-laqaa ke khaak 'aarif' ko yaaro ham to samajhte the ahl-e-din dariyaa mein log aae hain us ki bahaa ke khaak"

"har ghaDi chalti hai talvaar tire kuche mein roz mar rahte hain do chaar tire kuche mein haal sar kaa mire zaahir hai tire kyaa kiije koi saabit bhi hai divaar tire kuche mein shakl ko kyunki na har dafa badal kar aauun hain miri taak mein aghyaar tire kuche mein gham se badli hai miri shakl to be-khauf-o-khatar din ko bhi aate hain sau baar tire kuche mein na kare su-e-chaman bhuul ke bhi rukh hargiz aan kar bulbul-e-gulzaar tire kuche mein naragistaan na samajh kholi hui aankhon ko hain tire taalib-e-didaar tire kuche mein laae jab ghar se to behosh paDaa thaa 'aarif' ho gayaa aan ke hoshiyaar tire kuche mein"

"rukh par rahi vo zulf-e-moambar tamaam raat raushan na vasl mein huaa ye ghar tamaam raat dekhaa to ghaur se tire bimaar ko nahin us par paDi rahi hai ye chaadar tamaam raat dil ko bhi bhuul bhuul gayaa be-khudi mein kuchh DhunDaa kiyaa main kal jo tiraa ghar tamaam raat hovegaa qatl subh ko koi jo sakht-jaan karte rahe hain tez vo khanjar tamaam raat 'aarif' nahin hai ham ko subuhi ki ehtiyaat lete hain naam-e-saaqi-e-kausar tamaam raat"

"zor par aah thi aur naala-e-shab-gir bhi thaa maantaa ham ko kabhi ye falak-e-pir bhi thaa huur kaa dhyaan rahaa vaqt-e-shahaadat sab ko mahv surat pe tiri main dam-e-takbir bhi thaa dar-ba-dar mujh ko kiyaa dar se uThaa kar apne teraa aashiq to main thaa shahr mein tashhir bhi thaa bandagi qahr hai ilzaam uThaate hi bani hashr mein pesh agarche khat-e-taqdir bhi thaa"

"kyaa kahein ham the ki yaa dida-e-tar baiTh gae qulzum-e-ashk mein juun lakht-e-jigar baiTh gae naa-tavaan ham yuun tiri bazm se nikle kyunkar kise maalum hai ham aa ke kidhar baiTh gae aap ko khuun ke aansu hi rulaanaa hogaa haal-e-dil kahne ko ham apnaa agar baiTh gae kis ko ik dam kaa bharosa hai ki maanind-e-habaab bahr-e-hasti mein idhar aae udhar baiTh gae duur samjhaa hai raqibon ko yahaan se 'aarif' yaar ke paas jo be-khauf-o-khatar baiTh gae"

"tum jo kahte ho ki aaveinge tire haan kal tak kaun jiitaa hai judaai mein miri jaan kal tak tere vahshi kaa agar khaak uDaanaa hai yahi kahin DhunDaa bhi na paavegaa bayaabaan kal tak kuchh bhi kahte hain jaraahat ki mere ai hamdam iktifaa kyunki kare ek namak-daan kal tak duur se gar use tasvir dikhaa duun teri aap mein aave na phir shaahid-e-kanaan kal tak khaak mein aaj vo sar Thokarein khaate hain paDe jo imaarat kaa kiyaa karte the saamaan kal tak dil lagaati hai abas apne liye ai bulbul DhunDe paavegi na gul-haa-e-gulistaan kal tak kyaa nazar kaam kare us ke dahan par 'aarif' laakh dekhaa kare ye dida-e-hairaan kal tak"

"na parda kholiyo ai ishq gham mein tu meraa kahin na saamne un ke ho zard ru meraa tum apni zulf se puchho miri pareshaani ki haal us ko hai maalum hu-ba-hu meraa agarche laakh rafu-gar ne dil kiyaa behtar ye jab bhi ho na sakaa zakhm-e-dil rafu meraa faqat vo is liye aate hain jaanib-e-zindaan ki phans ke ghuTne lage tauq mein gulu meraa nishaana tir-e-nigah kaa ba-dil karun 'aarif' laDaae aankh agar mujh se jang-ju meraa"

"mere dil ko biThaa diyaa kis ne aa ke kaabe ko Dhaa diyaa kis ne puchho apne hi ghamze se ki mujhe khaak mein hi milaa diyaa kis ne kyaa tamaashaa hai puchhte hain vahi tere ghar ko luTaa diyaa kis ne shab-e-furqat mein kyaa na ham khaate ham ko par zahr laa diyaa kis ne vo jalaa dete hain jo khat meraa un ko 'aarif' paDhaa diyaa kis ne"

"us pe karnaa mire naalon ne asar chhoD diyaa mujh ko ek lutf ki kar ke jo nazar chhoD diyaa saunp kar khaana-e-dil gham ko kidhar jaate ho phir na paaoge agar us ne ye ghar chhoD diyaa ashk-e-sozaan ne jalaae mire laakhon daaman ponchhnaa main ne to ab dida-e-tar chhoD diyaa bakhiya-gar jal gayaa kyaa haath tiraa sozish se karte karte jo rafu chaak-e-jigar chhoD diyaa gulshan-e-dahr mein khaami ne bachaayaa ham ko dekh kar khaam kudurat ne samar chhoD diyaa le gae saamne haakim ke mire qaatil ko is ko us ne bhi samajh khun-e-pidar chhoD diyaa nek o bad kuchh nazar aataa nahin vo vahshat hai parda ghaflat kaa mire pesh-e-nazar chhoD diyaa kucha-e-zulf ko katraa ke gayaa dil rukh par us ne vo rasta-e-pur-khauf-o-khatar chhoD diyaa ai falak khaana-kharaabi ki hai parvaa kis ko dasht mein rahte hain muddat hui ghar chhoD diyaa mujh pe ehsaan sabaa kaa hai ki kuche mein tire khaak ko meri sar-e-raahguzar chhoD diyaa mujh ko ai aah taajjub hai ki kaashaana-e-ghair kal shab-e-hijr ne barsaa ke sharar chhoD diyaa bhar gayaa dil miraa ek chiiz ko khaate khaate khun-e-dil khaaeinge ab khun-e-jigar chhoD diyaa bojh se aap hi mar jaaegaa kyuun ho badnaam ye samajh kar but-e-saffaak ne sar chhoD diyaa nahin tir-e-nigah-e-yaar se bachnaa mumkin kal hai maujud vo din aaj agar chhoD diyaa aa gayaa dil mein jo aalam kaa musakhkhar karnaa zulf ko chehre pe hangaam-e-sahar chhoD diyaa ye nahin hai rah-e-but-khaana kidhar jaanaa hai aaj se ham ne tiraa saath khizar chhoD diyaa kar diyaa tiron se chhalni mujhe saaraa lekin khuun hone ke liye us ne jigar chhoD diyaa saath dekhaa thaa use kal to tere ai majnun aaj us 'aarif'-e-vahshi ko kidhar chhoD diyaa"

"is dar pe mujhe yaar machalne nahin dete armaan mire ji ke nikalne nahin dete dam dam mein khabar pahunche hai jo aane ki apni hai jaan labon par vo nikalne nahin dete aashob-e-qayaamat se zi-bas khauf hai sab ko do chaar qadam bhi unhein chalne nahin dete jaataa hai safaa-e-rukh-e-dildaar pe jab dil maqdur tak apne to phisalne nahin dete aadat mein karo farq na tum apni nigah se kyuun zahr use aaj ugalne nahin dete vo parda-nashini ki riaayat hai tumhaari ham baat bhi khalvat se nikalne nahin dete ye dast-basar rahne kaa 'aarif' vo mahal hai us jaa kaf-e-afsos bhi malne nahin dete"

"mar jaaeinge lekin kabhi ulfat na kareinge ham jiine ko apne ye musibat na kareinge hai dil mein ki mil jaaiye ab bul-havason mein phir ham se kahaan tak vo muravvat na kareinge kahte hain miri jaan kaa jaanaa nahin mumkin jab tak vo mujhe aap se rukhsat na kareinge ai khizr jo piinaa ho hamein aab-e-baqaa bhi is phirne se mai-khaane ki khidmat na kareinge tu ab to garebaan ko mire chhoD de 'aarif' bas aaj se ham tujh ko nasihat na kareinge"

"na aae saamne mere agar nahin aataa mujhe to us ke sivaa kuchh nazar nahin aataa balaa use bhi to kahte hain log aalam mein ajab hai kis liye vo mere ghar nahin aataa vo mere saamne tuubaa ko qad se maap chuke unhon ke naam-e-khudaa taa-kamar nahin aataa na be-khatar raho mujh se ki dard-mandon ke labon pe naala koi be-khatar nahin aataa Daraa diyaa hai kisi ne use magar 'aarif' mire kharaabe ki jaanib khizar nahin aataa"