main hikaayat-e-dil-e-be-navaa mein ishaarat-e-gham-e-jaavidaan — Afeef Siraj

sahraa mein base sab divaane shahron mein bhi mahshar hai barpaa
allaah tiri is khilqat se baaqi na rahaa viraana tak

is qadar naaz na kiije ki buzurgon ne bahut
baarhaa bazm-e-khud-aaraai sajaai hui hai

rah gayaa dard dil ke pahlu mein
ye jo ulfat thi dard-e-sar na hui

kaisi hain aazmaaishein kaisaa ye imtihaan hai
mere junun ke vaaste hijr ki ek raat bas

is qadar Duube gunaah-e-ishq mein tere habib
sochte hain jaaeinge kis munh se tauba ki taraf

kuchh khud mein kashish paidaa kar lo ki mahfil tum se aankh bhare
ye chaal baDe ayyaar ki hai ye chaal na khaali jaaegi

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

is nae saal ke svaagat ke liye pahle se
ham ne poshaak udaasi ki silaa ke rakh li

ab to vahaan hain jis kaa bayaan bhi hai laa-vajud
sadmon pe haae haae kare ab vo dil kahaan

khud ko bachaaun jism sambhaalun ki ruuh ko
bikhraa huaa hai dard yahaan se vahaan talak