jo tum ko dekh ke talvaar pheink duun apni — Ameer Imam

na aabshaar na sahraa lagaa sake qimat
ham apni pyaas ko le kar dahan mein lauT aae

shahr mein saare charaaghon ki ziyaa khaamosh hai
tirgi har samt phailaa kar havaa khaamosh hai

lagi vo tujh si to aalam mein munfarid Thahri
vagarna aam si lagti agar judaa lagti

vo maarka ki aaj bhi sar ho nahin sakaa
main thak ke muskuraa diyaa jab ro nahin sakaa

apni taraf to main bhi nahin huun abhi talak
aur us taraf tamaam zamaana usi kaa hai

jo shaam hoti hai har roz haar jaataa huun
main apne jism ki parchhaaiyon se laDte hue

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

subh savere ran paDnaa hai aur ghamsaan kaa ran
raaton raat chalaa jaae jis ko jaanaa hai

mere dil ki shaakh pe jaanaan
har mausam mein tu khiltaa hai

chalte chalte kuchh tham jaanaa phir bojhal qadmon se chalnaa
ye kaisi kasak si baaqi hai jab paanv mein vo kaanTaa bhi nahin

ain mumkin hai use mujh se mohabbat hi na ho
dil bahar-taur use apnaa banaanaa chaahe