subh savere ran paDnaa hai aur ghamsaan kaa ran — Iftikhar Arif

main zindagi ki duaa maangne lagaa huun bahut
jo ho sake to duaaon ko be-asar kar de

hamin mein rahte hain vo log bhi ki jin ke sabab
zamin buland hui aasmaan ke hote hue

dayaar-e-nur mein tira-shabon kaa saathi ho
koi to ho jo miri vahshaton kaa saathi ho

main chup rahaa ki vazaahat se baat baDh jaati
hazaar sheva-e-husn-e-bayaan ke hote hue

khaak mein daulat-e-pindaar-o-anaa milti hai
apni miTTi se bichhaDne ki sazaa milti hai

raas aane lagi duniyaa to kahaa dil ne ki jaa
ab tujhe dard ki daulat nahin milne vaali

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

pahle nahaai os mein phir aansuon mein raat
yuun buund buund utri hamaare gharon mein raat

dard-e-ulfat zindagi ke vaaste iksir hai
khaak ke putle isi jauhar se insaan ho gae

hamaare ghar kaa pataa puchhne se kyaa haasil
udaasiyon ki koi shahriyat nahin hoti