shab-e-jamaal salaamat rahein tire pari-zaad — Anjum Saleemi

dard se bhartaa rahaa zaat ke khaali-pan ko
thoDaa thoDaa yunhi bharpur kiyaa main ne mujhe

kaisi hoti hain udaasi ki jaDein
aa dikhaaun tujhe dil ke reshe

kisi tarah se nazar mutmain nahin hoti
har ek shai ko dobaara badal ke dekhtaa huun

Thiik se yaad bhi nahin ab to
ishq ne mujh mein kab qayaam kiyaa

barham hain mujh pe is liye donon taraf ke log
divaar uTh gai thi to dar kyuun banaayaa hai

patthar mein kaun jonk lagaaegaa mere dost
dil hai to mubtalaa bhi kahin honaa chaahiye

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aa ki tujh bin is tarah ai dost ghabraataa huun main
jaise har shai mein kisi shai ki kami paataa huun main