thaa vaada shaam kaa magar aae vo raat ko — Anwar Shuoor

ho gae din jinhein bhulaae hue
aaj kal hain vo yaad aae hue

dost kahtaa huun tumhein shaaer nahin kahtaa 'shuur'
dosti apni jagah hai shaaeri apni jagah

achchhaa khaasaa baiThe baiThe gum ho jaataa huun
ab main aksar main nahin rahtaa tum ho jaataa huun

farishton se bhi achchhaa main buraa hone se pahle thaa
vo mujh se intihaai khush khafaa hone se pahle thaa

ittifaaq apni jagah khush-qismati apni jagah
khud banaataa hai jahaan mein aadmi apni jagah

buraa bure ke alaava bhalaa bhi hotaa hai
har aadmi mein koi dusraa bhi hotaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

baarish ke baa'd raat saDak aaina si thi
ik paanv paaniyon pe paDaa chaand hil gayaa

vasl ki raat ke sivaa koi shaam
saath le kar sahar nahin aati

aankhon mein nahin silsila-e-ashk shab-o-roz
tasbih paDhaa karte hain din raat tumhaari