ho gae din jinhein bhulaae hue — Anwar Shuoor

dost kahtaa huun tumhein shaaer nahin kahtaa 'shuur'
dosti apni jagah hai shaaeri apni jagah

achchhaa khaasaa baiThe baiThe gum ho jaataa huun
ab main aksar main nahin rahtaa tum ho jaataa huun

farishton se bhi achchhaa main buraa hone se pahle thaa
vo mujh se intihaai khush khafaa hone se pahle thaa

ittifaaq apni jagah khush-qismati apni jagah
khud banaataa hai jahaan mein aadmi apni jagah

sirf us ke honT kaaghaz par banaa detaa huun main
khud banaa leti hai honTon par hansi apni jagah

buraa bure ke alaava bhalaa bhi hotaa hai
har aadmi mein koi dusraa bhi hotaa hai

mere khvaabon ke jharokon ko sajaate rahiye
na sahi vasl magar yaad to aate rahiye

na toDo dil ki hai kaaba kaa Dhaanaa
ye do ghar hain magar buniyaad hai ek

mujhe khabar hai kyaa kuchh hai buniyaadon mein
teri basti kaa pahlaa mazdur thaa main

hairat hai tum ko dekh ke masjid mein ai 'khumaar'
kyaa baat ho gai jo khudaa yaad aa gayaa

bas nahin chaltaa hai varna apne mar jaane ke saath
pheink dete khod kar duniyaa ki sab buniyaad ham

vaqt har zakhm ko bhar detaa hai kuchh bhi kiije
yaad rah jaati hai halki si chubhan ki had tak