mujhe bayaan kar rahaa thaa koi shakhs — Azhar Abbas

apne viraane kaa nuqsaan nahin chaahtaa main
yaani ab dusraa insaan nahin chaahtaa main

akelaa main hi nahin jaa rahaa huun basti se
ye raushni bhi mire saath jaane vaali hai

hansi mazaaq ki baatein yahin pe khatm huiin
ab is ke baa'd kahaani rulaane vaali hai

tu kahaani ke badalte hue manzar ko samajh
khuun rote hue kirdaar ki jaanib mat dekh

yuun to har ek shakhs kaa apnaa hi shor hai
lekin kisi se koi yahaan boltaa nahin

jo rukaavaT thi hamaari raah ki
raasta niklaa usi divaar se