jo rukaavaT thi hamaari raah ki — Azhar Abbas

apne viraane kaa nuqsaan nahin chaahtaa main
yaani ab dusraa insaan nahin chaahtaa main

akelaa main hi nahin jaa rahaa huun basti se
ye raushni bhi mire saath jaane vaali hai

hansi mazaaq ki baatein yahin pe khatm huiin
ab is ke baa'd kahaani rulaane vaali hai

tu kahaani ke badalte hue manzar ko samajh
khuun rote hue kirdaar ki jaanib mat dekh

yuun to har ek shakhs kaa apnaa hi shor hai
lekin kisi se koi yahaan boltaa nahin

mujhe bayaan kar rahaa thaa koi shakhs
main apni daastaan DhunDhtaa rahaa

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi