apne viraane kaa nuqsaan nahin chaahtaa main — Azhar Abbas

akelaa main hi nahin jaa rahaa huun basti se
ye raushni bhi mire saath jaane vaali hai

hansi mazaaq ki baatein yahin pe khatm huiin
ab is ke baa'd kahaani rulaane vaali hai

tu kahaani ke badalte hue manzar ko samajh
khuun rote hue kirdaar ki jaanib mat dekh

yuun to har ek shakhs kaa apnaa hi shor hai
lekin kisi se koi yahaan boltaa nahin

jo rukaavaT thi hamaari raah ki
raasta niklaa usi divaar se

mujhe bayaan kar rahaa thaa koi shakhs
main apni daastaan DhunDhtaa rahaa

sabhi se jab mohabbat chaahte ho
mohabbat kyon nahin karte sabhi se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

har taur har tarah ki jo zillat mujhi ko hai
duniyaa mein kyaa kisi se mohabbat mujhi ko hai

main jiyun ehsaan biThaa kar vo bhi ik kam-zarf kaa
zindagi pyaari hai lekin is qadar pyaari nahin

kam-zarf zamaane ki hiqaarat kaa gila kyaa
main khush huun miraa pyaar samundar ki tarah hai

rah-e-vafaa mein luTaa kar mataa-e-qalb-o-jigar
kiyaa hai teri mohabbat kaa haq adaa main ne