akelaa main hi nahin jaa rahaa huun basti se — Azhar Abbas

apne viraane kaa nuqsaan nahin chaahtaa main
yaani ab dusraa insaan nahin chaahtaa main

hansi mazaaq ki baatein yahin pe khatm huiin
ab is ke baa'd kahaani rulaane vaali hai

tu kahaani ke badalte hue manzar ko samajh
khuun rote hue kirdaar ki jaanib mat dekh

yuun to har ek shakhs kaa apnaa hi shor hai
lekin kisi se koi yahaan boltaa nahin

jo rukaavaT thi hamaari raah ki
raasta niklaa usi divaar se

mujhe bayaan kar rahaa thaa koi shakhs
main apni daastaan DhunDhtaa rahaa

banaayaa toD ke aaina aaina-khaana
na dekhi raah jo khalvat se anjuman ki taraf

mire siine se lag kar der tak roti hai tanhaai
kisi ne kah diyaa us se mohabbat ho gai mujh ko

ghuTan taDpan udaasi ashk rusvaai akelaa-pan
baghair in ke adhuri ishq ki har ik kahaani hai

havaa ki Dor mein TuuTe hue taare piroti hai
ye tanhaai ajab laDki hai sannaaTe mein roti hai

phailaa huaa hai jism mein tanhaaiyon kaa zahr
rag rag mein jaise saari udaasi utar gai

jahaan talak bhi ye sahraa dikhaai detaa hai
miri tarah se akelaa dikhaai detaa hai