kitne saada hain ham ki baiThe hain — Bilqis Zafirul Hasan

teri to 'bilqis' niraali hi baatein hain
is duniyaa mein kaise tiraa guzaaraa hogaa

apni to koi baat banaae nahin bani
kuchh ham na kah sake to kuchh us ne nahin suni

hai yuun ki kuchh to baghaavat-sirisht ham bhi hain
sitam bhi us ne zarurat se kuchh ziyaada kiyaa

uTh kar chale gae to kabhi phir na aaeinge
phir laakh tum bulaao sadaaein diyaa karo

dahshat-zada zamin par vahshat bhare makaan ye
is shahr-e-be-amaan kaa aakhir koi khudaa hai

dar badar ki khaak thi taqdir mein
ham liye kaandhon pe ghar chalte rahe

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

ek bachcha zehn se paisa kamaane ki machine
dusraa kamzor thaa so yarghamaali ho gayaa

na aankhon mein aansu na lab par tabassum
mohabbat mein aise bhi lamhaat aae