usi ne chaand ke pahlu mein ik charaagh rakhaa — Faheem Shanas Kazmi

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

tumhaari yaad nikalti nahin mire dil se
nasha chhalaktaa nahin hai sharaab se baahar

jin ko chhu kar kitne 'zaidi' apni jaan ganvaa baiThe
mere ahd ki shahnaazon ke jism baDe zahrile the

phir vahi shaam vahi dard vahi apnaa junun
jaane kyaa yaad thi vo jis ko bhulaae gae ham

bichhaD ke tujh se tiri yaad bhi nahin aai
makaan ki samt palaT kar makin nahin aayaa

kisi ke dil mein utarnaa hai kaar-e-laa-haasil
ki saari dhuup to hai aaftaab se baahar

vo chaand hai to aks bhi paani mein aaegaa
kirdaar khud ubhar ke kahaani mein aaegaa

ai mire dost ek muddat se
chaand dekhaa nahin teri chhat se

chaand taare to mire bas mein nahin hain 'aazar'
phuul laayaa huun miraa haath kahaan tak jaaataa

sharaab o saaqi-e-mah-ru jo saath hon 'bedaar'
to khush-numaa hai shab-e-maahtaab mein dariyaa

yaad-e-jaanaan utar ke aai hai
shab ke ziine se chaandni ki tarah

raat bhi murjhaa chali chaand bhi kumhlaa gayaa
phir bhi tiraa intizaar dekhiye kab tak rahe