vo aae to rang sanvarne lagte hain — Farhat Zahid

khizaan ke aakhiri din the vo khushbu maangne aayaa
miraa daaman hi khaali thaa main us ko phuul kyaa deti

maan ban chuki huun main bhi magar us se kyaa kahun
jo apni maan ke pyaar se aage na jaa sakaa

ajiib rut hai ye hijr-o-visaal se aage
kamaal hone lagaa hai kamaal se aage

alfaaz na aavaaz na hamraaz na dam-saaz
ye kaise doraahe pe main khaamosh khaDi huun

main bhi na thi kalaam mein itni faraakh-dil
kuchh vo bhi ikhtisaar se aage na jaa sakaa

aurat huun magar surat-e-kohsaar khaDi huun
ik sach ke tahaffuz ke liye sab se laDi huun

jab ki pahlu se yaar uThtaa hai
dard be-ikhtiyaar uThtaa hai

haal-e-dil yaar ko mahfil mein sunaaein kyun-kar
muddai kaan idhar aur udhar rakhte hain

aahein bhi kiin duaaein bhi maangin tire liye
main kyaa karun jo yaar kisi mein asar na ho

ai yaad-e-yaar dekh ki baa-vasf-e-ranj-e-hijr
masrur hain tiri khalish-e-naa-tavaan se ham

baad-e-shab-e-visaal na dekhun main daagh-e-hijr
yaa-rab charaagh-e-umr bujhaa de havaa-e-subh

yahi ronaa hai furqat mein to jaan aankhon se niklegi
hai murgh-e-aabi uDne ke liye tayyaar paani mein