'saabir' teraa kalaam sunein kyuun na ahl-e-fan — Fazal Husain Sabir

tu jafaaon se jo badnaam kiye jaataa hai
yaad aaegi tujhe meri vafaa mere baad

un ki maanind koi saahab-e-idraak kahaan
jo farishte nahin samjhe vo bashar samjhe hain

shagufta baagh-e-sukhan hai hamin se ai 'saabir'
jahaan mein misl-e-nasim-e-bahaar ham bhi hain

tum ne kyuun dil mein jagah di hai buton ko 'saabir'
tum ne kyuun kaaba ko but-khaana banaa rakkhaa hai

pyaaso raho na dasht mein baarish ke muntazir
maaro zamin pe paanv ki paani nikal paDe

khvaab Thahre the to aankhein bhigne se bach gaiin
varna chehre par to gham ki baarishon kaa aks hai

ab tak jism sulagtaa hai
kaisi thi barsaat na puchh

baarishein us kaa lab-o-lahja pahan leti thiin
shor karti thi vo barsaat mein jhaanjhar ki tarah

aankhon se mohabbat ke ishaare nikal aae
barsaat ke mausam mein sitaare nikal aae

aankh bhar aai kisi se jo mulaaqaat hui
khushk mausam thaa magar TuuT ke barsaat hui