baarishein us kaa lab-o-lahja pahan leti thiin — Mansoor Aafaque

vo tiraa unchi haveli ke qafas mein rahnaa
yaad aae to parindon ko rihaa kartaa huun

qayaam kartaa huun akasr main dil ke kamre mein
ki jam na jaae kahin gard us ki chizon par

tujh aisi narm garm kai laDkiyon ke saath
main ne shab-e-firaaq Dubo di sharaab mein

aa giraa zinda shamshaan mein lakDiyon kaa dhuaan dekh kar
ik musaafir parinda kai sard raaton kaa maaraa huaa

bas ek raat se kaise thakan utarti hai
badan ko chaahiye aaraam kuchh ziyaada hi

bas ek lunch hi mumkin thaa jaldi jaldi mein
use bhi jaanaa thaa mujh ko bhi kaam karnaa thaa

pyaaso raho na dasht mein baarish ke muntazir
maaro zamin pe paanv ki paani nikal paDe

ab zaminon ko bichhaae ki falak ko oDhe
muflisi to bhari barsaat mein be-ghar hui hai

hairat se taktaa hai sahraa baarish ke nazraane ko
kitni duur se aai hai ye ret se haath milaane ko

aankhon mein damak uTThi hai tasvir-e-dar-o-baam
ye kaun gayaa mere baraabar se nikal kar

baadalon ne aaj barsaayaa lahu
amn kaa har faakhta rone lagaa

main vo sahraa jise paani ki havas le Duubi
tu vo baadal jo kabhi TuuT ke barsaa hi nahin