duur ham se hain vo to kyaa Dar hai — George Puech Shor

ruke hai aamad-o-shud mein nafas nahin chaltaa
yahi hai hukm-e-ilaahi to bas nahin chaltaa

jahaan mein zar kaa hai kaarkhaana na koi apnaa na hai yagaana
talaash-e-daulat mein hai zamaana khudaa hi haafiz hai muflisi kaa

ik nazar ne kiyaa hai kaam tamaam
aarzu bhi to thi yahi dil ki

adam se hasti mein jab ham aae na koi hamdard saath laae
jo apne the vo hue paraae ab aasraa hai to bekasi kaa

hai talaash-e-do-jahaan lekin khabar apni kise
jite-ji tak justuju sab kuchh hai aur phir kuchh nahin

us maah-ru pe aankh kisi ki na paD saki
jalva thaa tuur kaa ki saraasar vo nuur thaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

ham dil hi dil mein us pe uThaa lete kuchh savaal
lekin ghuyub mein bhi vo haazir-javaab hai

jigar kisi kaa jale dil jale dimaagh jale
vo kah gae hain ki aaeinge ham charaagh jale

tu apne saath saath mein parda-nashin ko bhi
rusvaa karegaa ai dil-e-khaana-kharaab kyaa

ham-nashino kuchh na puchho haal-e-dil
ek shisha hai ki chaknaachur hai