khaar chubh kar jo TuTtaa hai kabhi — Goya Faqir Mohammad

bijli chamki to abr royaa
yaad aa gai kyaa hansi kisi ki

har gaam pe hi saae se ik misraa-e-mauzun
gar chand qadam chaliye to kyaa khuub ghazal ho

aasmaan kahte hain jis ko vo zamin-e-sher hai
maah-e-nau misraa hai vasf-e-abru-e-khamdaar mein

vo tifl-e-nusairi aae shaayad
qasmein duun murtazaa-ali ki

apne sivaa nahin hai koi apnaa aashnaa
dariyaa ki tarah aap hain apne kanaar mein

saare quraan se us pari-ru ko
yaad ik lafz-e-lan-taraani hai