bijli chamki to abr royaa — Goya Faqir Mohammad

har gaam pe hi saae se ik misraa-e-mauzun
gar chand qadam chaliye to kyaa khuub ghazal ho

aasmaan kahte hain jis ko vo zamin-e-sher hai
maah-e-nau misraa hai vasf-e-abru-e-khamdaar mein

vo tifl-e-nusairi aae shaayad
qasmein duun murtazaa-ali ki

khaar chubh kar jo TuTtaa hai kabhi
aabla phuuT phuuT rotaa hai

apne sivaa nahin hai koi apnaa aashnaa
dariyaa ki tarah aap hain apne kanaar mein

saare quraan se us pari-ru ko
yaad ik lafz-e-lan-taraani hai

mere khvaabon ke jharokon ko sajaate rahiye
na sahi vasl magar yaad to aate rahiye

khalvat-e-ummid mein raushan hai ab tak vo charaagh
jis se uThtaa hai qarib-e-shaam yaadon kaa dhuaan

vo mire kaase mein yaadein chhoD kar yuun chal diyaa
jis tarah alfaaz jaate hon muaani chhoD kar

kabhi kitaabon mein phuul rakhnaa kabhi darakhton pe naam likhnaa
hamein bhi hai yaad aaj tak vo nazar se harf-e-salaam likhnaa

pichhle janam kaa koi ta'alluq thaa us ke saath
dekhe baghair mujh ko khad-o-khaal yaad the

vafaadaari ghurur-e-be-rukhi ko khatm kar degi
ziyaada to nahin kuchh din rahein vo bad-gumaan shaayad