guzar jaaegi saari raat is mein — Humaira Rahat

bahut taakhir se paayaa hai khud ko
main apne sabr kaa phal ho gai huun

sunaa hai khvaab mukammal kabhi nahin hote
sunaa hai ishq khataa hai so kar ke dekhte hain

huzur aap koi faisla karein to sahi
hain sar jhuke hue darbaar bhi lagaa huaa hai

zikr sunti huun ujaale kaa bahut
us se kahnaa ki mire ghar aae

taalluq ki nai ik rasm ab ijaad karnaa hai
na us ko bhulnaa hai aur na us ko yaad karnaa hai

jahaan ik shakhs bhi miltaa nahin hai chaahne se
vahaan ye dil hatheli par zamaana chaahtaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

in andheron se pare is shab-e-gham se aage
ik nai subh bhi hai shaam-e-alam se aage