barg-e-aavaara ko ab apnaa pata yaad nahin — Imtiyaz Ahmad Qamar

yuun to qadam qadam pe khudaa sainkaDon mile
banda na mil sakaa koi bandon ke shahr mein

us 'qamar' ko hai khud ab apne hi chehre ki talaash
jis ko duniyaa ne kahaa aaj kaa gyaani hai yahi

jal-bujhi hogi koi aag kisi din us mein
be-sabab hi to nahin daagh 'qamar' mein aayaa

zabt-e-gham kaa mire andaaza bhalaa kyaa hotaa
main agar dasht na hotaa bhi to dariyaa hotaa

jab shahr mein dushman miraa koi bhi nahin thaa
phir kaun ye khanjar ki zabaan bol rahaa hai

mire hi hisse mein azmat salib-o-daar ki thi
mujhe hi ahd kaa apne rasul honaa thaa

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

aaina toD Daalaa hai ab tere aks ko
tasvir kar rahaa huun tiri yaad joD kar