divaangi kaa sabab puchhaa jaa rahaa thaa miri — Ismail Raaz

hijr ki raat hai aur aankh mein aansu bhi nahin
aise mausam mein to barsaat huaa karti thi

jo apnaa hissa bhi auron mein baanT detaa hai
ik aise shakhs ke hisse mein aa gae the ham

dar-asl main ne mashaqqat nahin mohabbat ki
hatheliyon pe nahin mere dil pe chhaale hain

us vaqt ke sadmon ne mujhe chaaT liyaa hai
jo vaqt abhi main ne guzaaraa bhi nahin thaa

main baDaa ho gayaa huun magar bachpanaa
mere dil se kabhi bhi gayaa hi nahin

raat yuun dil mein tiri khoi hui yaad aai
jaise viraane mein chupke se bahaar aa jaae

alvidaa'i shaam aa pahunchi yahaan
chup hai tu meraa khudaa hote hue

kaho kyaa baat karti hai kabhi sahraa ki khaamoshi
kahaa us khaamushi mein bhi to ik taqrir hoti hai

ye dil kaa karb labon tak kabhi na aaegaa
mire liye ye khamoshi kaa irtiqaa hi sahi

khuli zabaan to zarf un kaa ho gayaa zaahir
hazaar bhed chhupaa rakkhe the khamoshi mein