subh aataa huun yahaan aur shaam ho jaane ke baad — Jamal Ehsani

isi ik baat par hai ittifaaq-o-ikhtilaaf us se
use aaina aur mujh ko piyaala achchhaa lagtaa hai

hazaar tarah ke the ranj pichhle mausam mein
par itnaa thaa ki koi saath rone vaalaa thaa

jo dil ke taaq mein tu ne charaagh rakkhaa thaa
na puchh main ne use kis tarah sitaara kiyaa

kisi bhi vaqt badal saktaa hai lamha koi
is qadar khush bhi na ho meri pareshaani par

vo log mere bahut pyaar karne vaale the
guzar gae hain jo mausam guzarne vaale the

vo bhi milne nai poshaak badal kar aayaa
main jo kal pairahan-e-khaak badal kar aayaa

aankhon mein meri subh-e-qayaamat gai jhamak
siine se us pari ke jo parda ulaT gayaa

chaman ke phuul bhi tere hi khosha-chin nikle
kisi mein rang hai teraa kisi mein bu teri

shab un ki hai jo teraa khvaab dekhein aur din un kaa
jo baiThe yaad tujh ko subh se taa-shaam karte hain

Tapakte hain shab-e-gham dil ke TukDe dida-e-tar se
sahar ko kaise kaise phuul chuntaa huun main bistar se

shafaq kaa rang kitne vaalehaana-pan se bikhraa hai
zamin o aasmaan ne mil ke unvaan-e-sahar likkhaa

ab kaun si mataa-e-safar dil ke paas hai
ik raushani-e-subh thi vo bhi udaas hai