kisi bhi vaqt badal saktaa hai lamha koi — Jamal Ehsani

isi ik baat par hai ittifaaq-o-ikhtilaaf us se
use aaina aur mujh ko piyaala achchhaa lagtaa hai

hazaar tarah ke the ranj pichhle mausam mein
par itnaa thaa ki koi saath rone vaalaa thaa

jo dil ke taaq mein tu ne charaagh rakkhaa thaa
na puchh main ne use kis tarah sitaara kiyaa

vo log mere bahut pyaar karne vaale the
guzar gae hain jo mausam guzarne vaale the

chaaron jaanib rachi hui hai ashkon ki bu-baas
is raste se guzre honge qaafile hijrat vaale

vo bhi milne nai poshaak badal kar aayaa
main jo kal pairahan-e-khaak badal kar aayaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

dil ko to bahut pahle se dhaDkaa saa lagaa thaa
paanaa tiraa shaayad tujhe khone ke liye hai

haan dil-e-be-taab chande intizaar
amn-o-raahat kaa Thikaana aur hai

nikhat vahi surur vahi dil-kashi vahi
aamad ye aap ki hai ki jhonkaa bahaar kaa

kyuun kisi se vafaa kare koi
dil na maane to kyaa kare koi