kaise kisi ki yaad hamein zinda rakhti hai — Jawad Sheikh

kar kuchh aisaa ki tujhe yaad rakhun
bhuul jaane kaa taqaazaa hi sahi

main is khayaal se jaate hue use na milaa
ki rok lein na kahin saamne khaDe aansu

apne saamaan ko baandhe hue is soch mein huun
jo kahin ke nahin rahte vo kahaan jaate hain

kyaa hai jo ho gayaa huun main thoDaa bahut kharaab
thoDaa bahut kharaab to honaa bhi chaahiye

main ab kisi ki bhi ummid toD saktaa huun
mujhe kisi pe bhi ab koi e'tibaar nahin

apni taaid pe khud aql bhi hairaan hui
dil ne aise mire khvaabon ki himaayat ki hai

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

us kaa to ek lafz bhi ham ko nahin hai yaad
kal raat ek sher kahaa thaa jo khvaab mein

haan vo din yaad hain jab ham bhi kahaa karte the
ishq kyaa chiiz hai is ishq mein kyaa hotaa hai

hasin yaadon ke chaand ko alvidaaa kah kar
main apne ghar ke andhere kamron mein lauT aayaa

aaj teri yaad se Takraa ke TukDe ho gayaa
vo jo sadiyon se luDhaktaa ek patthar mujh mein thaa