siskiyaan bhar ke 'sharar' kaun vahaan rotaa thaa — Kaleem Haider Sharar

ab is ko zindagi kahiye ki ahd-e-be-hisi kahiye
gharon mein log rote hain magar raston pe hanste hain

kai logon ne phalte phulte peDon se jaanaa hai
magar main ne tujhe sabze ki uryaani se pahchaanaa

apne darvaaze pe baiThaa sochtaa rahtaa huun main
meraa ghar ajdaad ki baara-dari kaa karb hai

yahaan pe dasht o samundar ki baat mat karnaa
hamaare shahr kaa har shakhs hai makaan-zada

haqiqat hai ise maanein na maanein ghaTti baDhti hain
vo jhuTi hon ki sachchi daastaanein ghaTti baDhti hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

khabar kise subh-o-shaam ki hai taainaat aur quyud kaise
namaaz kis ki vahaan kisi ko khayaal tak bhi nahin vuzu kaa

shama-ruon ki mohabbat kaa jo dam bharte hain
ek muddat vo abhi baiat-e-parvaana karein

mire vajud mein shaamil rahe hain kitne vajud
to phir ye kaise kahun jo kiyaa kiyaa main ne