rang khushbu aur mausam kaa bahaanaa ho gayaa — Khalid Ghani

ab miri tanhaai bhi mujh se baghaavat kar gai
kal yahaan jo kuchh huaa thaa sab fasaanaa ho gayaa

mire suluk ki qimat yahin adaa kar de
mujhe gunaah ki lazzat se aashnaa kar de

lakirein piTne vaalon ko 'khaalid'
lakiron par hansi aane lagi hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

jaane kitne Dubne vaale saahil par bhi Duub gae
pyaare! tufaanon mein rah kar itnaa bhi ghabraanaa kyaa

jangalon mein kahin kho jaanaa hai
jaanvar phir mujhe ho jaanaa hai

bhuul jaanaa thaa jise sabt hai dil par mere
yaad rakhnaa thaa jise us ko bhulaa baiThaa huun