phir is ke baad miri raat be-misaal hui — Khalid Karrar

baat ye hai ki sabhi bhaai mire dushman hain
masala ye hai ki main yusuf-e-saani bhi nahin

koi to aae sunaae naved-e-taaza mujhe
uTho ki hashr se pahle hisaab hone lagaa

sach to ye hai ki mire paas hi dirham kam hain
varna is shahr mein is darja giraani bhi nahin

safar rasta saubat khvaab sahraa
samundar vaahima khunaab sahraa

kalisaa maulvi raahib pujaari
kalas minaar but mehraab sahraa

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

pahaaD jaise dinon ko to kaaT luun lekin
nikal na paaun main ik raat ki giraani se

har vaqt ki aah-o-zaari se dam bhar to zaraa milti fursat
ronaa hi muqaddar thaa meraa to kis liye main shabnam na huaa