dasht-e-junun ki khaak uDaane vaalon ki himmat dekho — Kumar Pashi

koi to DhunD ke mujh ko kahin se le aae
ki khud ko dekhaa nahin hai bahut zamaanon se

hain saare inkishaaf apne hain saare mumkinaat apne
ham is duniyaa kaa saaraa ilm le jaaeinge saath apne

kuchh ghazlein un zulfon par hain kuchh ghazlein un aankhon par
jaane vaale dost ki ab ik yahi nishaani baaqi hai

oDh liyaa hai main ne libaadaa shishe kaa
ab mujh ko kisi patthar se Takraane do

teri yaad kaa har manzar pas-manzar likhtaa rahtaa huun
dil ko varaq banaataa huun aur shab bhar likhtaa rahtaa huun

din chaDh aayaa kyon nahin aae jaaein un se puchh aaein
lekin un ke paas to ai dil koi bahaana hogaa hi

khudaayaa jazba-e-dil ki magar taasir ulTi hai
ki jitnaa khinchtaa huun aur khinchtaa jaae hai mujh se

ye to apnaa apnaa hai hausla ye to apni apni uDaan hai
koi uD ke rah gayaa baam tak koi kahkashaan se guzar gayaa

aap ko kho ke tum ko DhunDh liyaa
hausla thaa ye mere hi dil kaa

fazaa mein guunj rahi hain kahaaniyaan gham ki
hamin ko hausla-e-sharh-e-daastaan na rahaa

nahin maalum kitne ho chuke hain imtihaan ab tak
magar tere vafaadaaron ki himmat hai javaan ab tak

lazzat-e-gham to bakhsh di us ne
hausle bhi 'adam' diye hote