tirgi khaamushi bebasi tishnagi — Lata Haya

main to mushtaaq huun aandhi mein bhi uDne ke liye
main ne ye shauq ajab dil ko lagaa rakkhaa hai

jise paDhaa nahin tum ne kabhi mohabbat se
kitaab-e-zist kaa vo baab hain mire aansu

log nafrat ki fazaaon mein bhi ji lete hain
ham mohabbat ki havaa se bhi Daraa karte hain

qismat ajiib khel dikhaati chali gai
jo hans rahe the un ko rulaati chali gai

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

mujhe to ishq hai phulon mein sirf khushbu se
bulaa rahi hai kisi laala ki mahak mujh ko

jo nuur bharte the zulmaat-e-shab ke sahraa mein
vo chaand taare falak se utar gae shaayad

rang khushbu aur mausam kaa bahaanaa ho gayaa
apni hi tasvir mein chehra puraanaa ho gayaa