jo nuur bharte the zulmaat-e-shab ke sahraa mein — Khaleel Mamoon

hazaaron chaand sitaare chamak gae hote
kabhi nazar jo tiri maail-e-karam hoti

meri tarah se ye bhi sataayaa huaa hai kyaa
kyuun itne daagh dikhte hain mahtaab mein abhi

sab log hamein ek nazar aate hain
andaaza nahin hotaa hai ab chehron kaa

aisaa ho zindagi mein koi khvaab hi na ho
andhiyaari raat mein koi mahtaab hi na ho

tum nahin aaoge khabar hai hamein
phir bhi ham intizaar kar leinge

vo buraai sab se meri kar rahe hain
kyuun nahin karte bayaan achchhaaiyon ko

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

tamsil o istiaaraa o tashbih sab durust
us ki misaal kyaa jo adim-ul-misaal ho

guzri siyaahkaari mein yaa rab tamaam umr
aadhi shabaab mein kaTi aadhi khizaab mein

aaj pi lene de saaqi mujhe ji lene de
kal miri raat khudaa jaane kahaan guzregi