har vaqt fikr-e-marg-e-gharibaana chaahiye — Majeed Amjad

nigah uThi to zamaane ke saamne tiraa ruup
palak jhuki to mire dil ke ru-ba-ru tiraa gham

main roz idhar se guzartaa huun kaun dekhtaa hai
main jab idhar se na guzrungaa kaun dekhegaa

masih-o-khizr ki umrein nisaar hon us par
vo ek lamha jo yaaron ke darmiyaan guzre

salaam un pe tah-e-tegh bhi jinhon ne kahaa
jo teraa hukm jo teri razaa jo tu chaahe

haae vo zindagi-fareb aankhein
tu ne kyaa sochaa main ne kyaa samjhaa

tire khayaal ke pahlu se uTh ke jab dekhaa
mahak rahaa thaa zamaane mein chaar-su tiraa gham

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ishq aur aql mein hui hai shart
jiit aur haar kaa tamaashaa hai

haakim-e-ishq ne jab aql ki taqsir suni
ho ghazab hukm diyaa des nikaalaa karne

bagulaa jin ke sar par chatr-e-shaahi hai zamin masnad
vahi aqlim-e-gham mein aah ki naubat bajaate hain

tark-e-mohabbat karne vaalo kaun aisaa jug jiit liyaa
ishq se pahle ke din socho kaun baDaa sukh hotaa thaa