ham ko usi dayaar ki miTTi hui aziiz — Midhat

laai hai kahaan mujh ko tabiat ki do-rangi
duniyaa kaa talabgaar bhi duniyaa se khafaa bhi

tu samajhtaa hai mujhe harf-e-mukarrar lekin
main sahifa huun tire dil pe utarne vaalaa

jism us ki god mein ho ruuh tere ru-ba-ru
faahisha ke garm bistar par riyaa-kaari karun

aankhein hain magar khvaab se mahrum hain 'midhat'
tasvir kaa rishta nahin rangon se zaraa bhi

jaane vaale mujhe kuchh apni nishaani de jaa
ruuh pyaasi na rahe aankh mein paani de jaa

teri auqaat hi kyaa 'midhat-ul-akhtar' sun le
shahr ke shahr zaminon ke tale dab gae hain

jab ki pahlu se yaar uThtaa hai
dard be-ikhtiyaar uThtaa hai

jo dil ne kahi lab pe kahaan aai hai dekho
ab mahfil yaaraan mein bhi tanhaai hai dekho

saakinaan-e-shahr ab hoshyaar honaa chaahiye
member aur voter kaa kuchh meaar honaa chaahiye

tumhaari rah kaa rahaa ham ko har taraf dhokaa
chale jidhar ko so be-ikhtiyaar ho ke chale

zindagi jin ki rifaaqat pe bahut naazaan thi
un se bichhDi to koi aankh mein aansu bhi nahin

saaf kahiye ki pyaar karte hain
ye nigaahon kaa qaul-e-mubham kyaa