musibat thi hamaare hi liye kyuun — Mirza Mohammad Hadi Aziz Lakhnavi

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

udaasi ab kisi kaa rang jamne hi nahin deti
kahaan tak phuul barsaae koi gor-e-gharibaan par

nazaa kaa vaqt hai baiThaa hai sirhaane koi
vaqt ab vo hai ki marnaa hamein manzur nahin

husn-e-aaraasta qudrat kaa atiyya hai magar
kyaa miraa ishq-e-jigar-soz khudaa-daad nahin

ab chaman mein bhi kisi surat se ji lagtaa nahin
haan magar jab tak qafas mein the qafas badnaam thaa

hamesha tinke hi chunte guzar gai apni
magar chaman mein kahin aashiyaan banaa na sake

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vaqt-e-rukhsat alvidaaa kaa lafz kahne ke liye
vo tire sukhe labon kaa thartharaanaa yaad hai

aisi zid kaa kyaa Thikaanaa apnaa mazhab chhoD kar
main huaa kaafir to vo kaafir musalmaan ho gayaa

qudrat khudaa ki dekhiye pistaan-e-yaar mein
paivand faalse kaa lagaa hai anaar mein

aataa hai yahaan sab ko bulandi se giraanaa
vo log kahaan hain ki jo girton ko uThaaein