Shayari Of Unknown

gumāñ kis par kareñ suufī idhar hai us taraf vaa.iz
ḳhudā rakkhe mohalle meñ sabhī allāh vaale haiñ

maiñ ro ro ke kahne lagā dard-e-dil
vo muñh pher kar muskurāne lagā

kī mohabbat to siyāsat kā chalan chhoḌ diyā
ham agar ishq na karte to hukūmat karte

mahfil meñ chaar chāñd lagāne ke bāvajūd
jab tak na aap aa.e ujālā na ho sakā

ḳhush-āmdīd vo aayā hamārī chaukhaT par
bahār jis ke qadam kā tavāf kartī hai

idhar se taqāzā udhar se taġhāful
ajab khīñchā-tānī meñ paiġhām-bar hai

guzar to jā.egī tere baġhair bhī lekin
bahut udaas bahut be-qarār guzregī

be piye hī sharāb se nafrat
ye jahālat nahīñ to phir kyā hai

jaan lenī thī saaf kah dete
kyā zarūrat thī muskurāne kī

jab tak bikā na thā to koī pūchhtā na thā
tū ne ḳharīd kar mujhe anmol kar diyā

dil TūTne se thoḌī sī taklīf to huī
lekin tamām umr ko ārām ho gayā

siine meñ ābād hamesha rahtī hai
pahlī mohabbat yaad hamesha rahtī hai