udaasi ab kisi kaa rang jamne hi nahin deti — Mirza Mohammad Hadi Aziz Lakhnavi

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

nazaa kaa vaqt hai baiThaa hai sirhaane koi
vaqt ab vo hai ki marnaa hamein manzur nahin

husn-e-aaraasta qudrat kaa atiyya hai magar
kyaa miraa ishq-e-jigar-soz khudaa-daad nahin

ab chaman mein bhi kisi surat se ji lagtaa nahin
haan magar jab tak qafas mein the qafas badnaam thaa

usi ko hashr kahte hain jahaan duniyaa ho fariyaadi
yahi ai mir-e-divaan-e-jazaa kyaa teri mahfil hai

hamesha tinke hi chunte guzar gai apni
magar chaman mein kahin aashiyaan banaa na sake

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

us shakhs ke gham kaa koi andaaza lagaae
jis ko kabhi rote hue dekhaa na kisi ne

gham o nashaat ki har rahguzar mein tanhaa huun
mujhe khabar hai main apne safar mein tanhaa huun