ghol ke ghol mire sahn mein aa baiThte hain — Noman Badr

main kaaTaa jaaungaa sab ko 'aziz hote hue
saDak ke biich mein aayaa huaa darakht huun main

ye lamha jis mein ham aaj chhup kar gale mile hain
agar muqaddar nahin milaa to sazaa banegaa

ham ko khushiyaan bhi udaasi ke lifaafe mein milin
ham saa bad-bakht zamaane mein nahin hai koi

lafz-e-ehsaas ko tasvir nahin kar sakte
'ishq duniyaa ki zabaanon se baDaa hai shaayad

hamaare baa'd bhi tum qahqahe lagaate ho
tumhaare baa'd to ham baat bhi nahin karte

tumhaare saath ik duniyaa khaDi hai
hamaare saath to ham bhi nahin hain

kabhi khauf thaa tire hijr kaa kabhi aarzu ke zavaal kaa
rahaa hijr-o-vasl ke darmiyaan tujhe kho sakaa na main paa sakaa

dukh se do chaar saal chhoTaa huun
hijr se ek din baDaa huun

aise hijr ke mausam kab kab aate hain
tere alaava yaad hamein sab aate hain

khudaa kare ki tiri umr mein gine jaaein
vo din jo ham ne tire hijr mein guzaare the

ab ibaadat mein bhi aa jaate ho lab par mere
itnaa paDhtaa huun tumhein hijr ke lamhon mein ki bas

kisi ke hijr mein jiinaa muhaal ho gayaa hai
kise bataaein hamaaraa jo haal ho gayaa hai