milnaa kaisaa ki yaad bhi na kiyaa — Nwab Saif Ali Sayyaf

mere naalon ki jo aavaaz pahunch jaati hai
ghar se baahar nikal aate hain pareshaan ho kar

khudaaraa ik nigaah-e-naaz hi se dekh lo ham ko
garebaan phaaDne ko aaj ham tayyaar baiThe hain

aa jaaein vaqt-e-naza to main un ko dekh luun
armaan koi dil mein ab is ke sivaa nahin

junun-e-mohabbat ne ye din dikhaayaa
ki duniyaa mein rusvaa huaa chaahtaa huun

thi dard ki jab tak dil mein khaTak hiltaa thaa falak larzaan thi zamin
ham aahein jis dam bharte the ik mahshar barpaa hotaa thaa

parde mein vo to chhup gae dikhlaa ke ik jhalak
main pech-o-taab mein rahaa din bhar tamaam raat

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

be-barse guzar jaate hain umDe hue baadal
jaise unhein meraa hi pataa yaad nahin hai

lete hain tiraa naam hi yuun jaagte sote
jaise ki hamein apnaa khudaa yaad nahin hai

yaad aai na kabhi be-sar-o-saamaani mein
dekh kar ghar ko gharib-ul-vatani yaad aai

bhaag chalun yaadon ke zindaan se akasr sochaa lekin
jab bhi qasd kiyaa to dekhaa unchi hai divaar bahut