lete hain tiraa naam hi yuun jaagte sote — Waheed Akhtar

zer-e-paa ab na zamin hai na falak hai sar par
sail-e-takhliq bhi girdaab kaa manzar niklaa

harf-e-inkaar hai kyuun naar-e-jahannam kaa halif
sirf iqraar pe kyuun baab-e-iram khultaa hai

maangne vaalon ko kyaa izzat o rusvaai se
dene vaalon ki amiri kaa bharam khultaa hai

jo sunnaa chaaho to bol uTTheinge andhere bhi
na sunnaa chaaho to dil ki sadaa sunaai na de

hazaaron saal safar kar ke phir vahin pahunche
bahut zamaana huaa thaa hamein zamin se chale

bichhDe hue khvaab aa ke pakaD lete hain daaman
har raasta parchhaaiyon ne rok liyaa hai

mere khvaabon ke jharokon ko sajaate rahiye
na sahi vasl magar yaad to aate rahiye

hamin ne hashr uThaa rakkhaa hai bichhaDne par
vo jaan-e-jaan to pareshaan bhi ziyaada nahin

dilon pe dard kaa imkaan bhi ziyaada nahin
vo sabr hai abhi nuqsaan bhi ziyaada nahin

use to daulat-e-duniyaa bhi kam bhi paane ko
miri to zaat kaa mizaan bhi ziyaada nahin

tamaam ishq ki mohlat hai is aankhon mein
aur ek lamha-e-imkaan bhi ziyaada nahin

divaar-o-dar saa chaahiye divaar-o-dar mujhe
divaangi mein yaad nahin apnaa ghar mujhe