tire baghair tere intizaar se thak kar — Qaisar Nizami

khizaan ki zad mein hi ab tak tiraa gulistaan thaa
hamin ne aa ke bahaaron ko zindagi bakhshi

— Qaisar Nizami

tamaam umr rahe meraa muntazir tu bhi
tamaam umr mire intizaar ko tarse

— Qaisar Nizami

tu saraapaa nuur hai main teraa aks-e-khaas huun
kah rahe hain yuun tiraa sab aaina-khaana mujhe

— Qaisar Nizami

ab to rusvaaiyaan yaqini hain
un ke lab par miraa fasaana hai

— Qaisar Nizami

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi

phir baiThe baiThe vaada-e-vasl us ne kar liyaa
phir uTh khaDaa huaa vahi rog intizaar kaa

— Ameer Minai

kisi ke raste pe kaise nazrein jamaae rakkhun
abhi to karnaa mujhe hai khud intizaar meraa

— Alam Khursheed

barseingi aaj rahmatein aamad hai yaar ki
naayaab hain ye ghaDiyaan tire intizaar ki

— Ameeta Parsuram Meeta