kab alam aur hasratein apni kahein ai dostaan — Raza Azimabadi

khushaa ho kar butaan kab aashiqon ko yaad karte hain
'razaa' hairaan huun main kis baat par hai utnaa bholaa tu

sunte to the 'razaa' hain sab hain baDe musalmaan
par kufr mein ziyaada nikle vo barahman se

dekhi thi ek raat tiri zulf khvaab mein
phir jab talak jiyaa main pareshaan hi rahaa

imaarat dair o masjid ki bani hai iinT o patthar se
dil-e-viraana ki kis chiiz se taamir hoti hai

kaabe mein shaikh mujh ko samjhe zalil lekin
sau shukr mai-kade mein hai e'tibaar apnaa

ik dam ke vaaste na kiyaa kyaa kyaa ai 'razaa'
dekhaa chhupaayaa toDaa banaayaa kahaa sunaa

jab ki pahlu se yaar uThtaa hai
dard be-ikhtiyaar uThtaa hai

fan jo meaar tak nahin pahunchaa
apne shahkaar tak nahin pahunchaa

taraf-e-kaaba na jaa haj ke liye naadaan hai
ghaur kar dekh ki hai khaana-e-dil maskan-e-dost

ai ishq jahaan hai yaar meraa
mujh ko bhi usi jagah tu le chal

sach bataa ishq mujhe sakht pareshaan huun main
kyuun khafaa hotaa nahin dost khataa par meri

mujh ko ye soch hai jiite hain ve kyun-kar yaa-rab
apne maashuqon se jo shakhs judaa rahte hain