Shayari Of Mushafi Ghulam Hamdani

jam.a rakhte nahīñ, nahīñ ma.alūm
ḳharch apnā kahāñ se uThtā hai

harba hai āshiqoñ kā faqat āh-e-pechdār
darvesh log rakhte haiñ jaise hiran kī shāḳh

do tiin dam-e-sard bhare haiñ to vo bole
jaao mirī majlis ko na kashmīr banāo

jism ne rūh-e-ravāñ se ye kahā turbat meñ
ab mujhe chhoḌ ke tanhā tū kahāñ jaatī hai

sādiq se bas ik aan meñ ho jaave tū kāzib
dikhlā.ūñ agar tujh ko maiñ us zulf kā ḳham sub.h

hindostāñ meñ daulat o hashmat jo kuchh ki thī
kāfir firañgiyoñ ne ba-tadbīr khīñch lī

qātil tirī galī bhī badaun se kam nahīñ
jis ke qadam qadam pe mazār-e-shahīd hai

pairahan luuTe maze terī ham-āġhoshī ke
ham kareñ chaak garebān ḳhudā kī qudarat

roz-e-visāl jis ko kahtī hai ḳhalq vo hī
maz.hab meñ āshiqoñ ke roz-e-vafāt bhī hai

ai 'mus.hafī' ab chakhiyo mazā zohd kā tum ne
mai-ḳhāne meñ jā jā ke bahut pī haiñ sharābeñ

sadā paan khā khā ke nikle hai bāhar
zamāne meñ ḳhūñ-ḳhvār paidā huā hai

rahī hamesha taraqqī mirī asīrī ko
gale paḌī jo huī paañv se judā zanjīr