aisī hī intizār meñ lazzat agar na ho — Riyaz Khairabadi

hindostāñ meñ dhuum hai kis kī zabān kī
vo kaun hai 'riyāz' ko jo jāntā nahīñ

muflisoñ kī zindagī kā zikr kyā
muflisī kī maut bhī achchhī nahīñ

itnī pī hai ki ba.ad-e-tauba bhī
be-piye be-ḳhudī sī rahtī hai

ye kam-baḳht ik jahān-e-ārzū hai
na ho koī hamārā dil ho ham huuñ

sayyād terā ghar mujhe jannat sahī magar
jannat se bhī sivā mujhe rāhat chaman meñ thī

bach jaa.e javānī meñ jo duniyā kī havā se
hotā hai farishta koī insāñ nahīñ hotā

vo na aa.egā hameñ ma.alūm thā is shaam bhī
intizār us kā magar kuchh soch kar karte rahe

maanā ki terī diid ke qābil nahīñ huuñ maiñ
tū merā shauq dekh mirā intizār dekh

bārhā terā intizār kiyā
apne ḳhvāboñ meñ ik dulhan kī tarah

bāġh-e-bahisht se mujhe hukm-e-safar diyā thā kyuuñ
kār-e-jahāñ darāz hai ab mirā intizār kar

ye daaġh daaġh ujālā ye shab-gazīda sahar
vo intizār thā jis kā ye vo sahar to nahīñ

jāntā hai ki vo na ā.eñge
phir bhī masrūf-e-intizār hai dil