dil ki barbaadiyon kaa ronaa kyaa — Saghar Nizami

sailaab-e-tabassum se darmaan-e-jaraahat kar
TukDe dil-e-bismil ke aaluda-e-khun kab tak

vo savaal-e-lutf par patthar na barsaaein to kyuun
un ko parvaa-e-shikast-e-kaasa-e-saail nahin

sajde miri jabin ke nahin is qadar haqir
kuchh to samajh rahaa huun tire aastaan ko main

DhunDhne ko tujhe o mere na milne vaale
vo chalaa hai jise apnaa bhi pataa yaad nahin

nazar karam ki faraavaaniyon pe paDti hai
phir apne daaman-e-khaaki ko dekhtaa huun main

husn ne dast-e-karam khinch liyaa hai kyaa khuub
ab mujhe bhi havas-e-lazzat-e-aazaar nahin

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai