raat ki sarhad yaqinan aa gai — Sarfraz Danish

chand lamhe ko tu khvaabon mein bhi aa kar jhaank le
zindagi tujh se mile kitne zamaane ho gae

ham apne jalte hue ghar ko kaise ro lete
hamaare chaaron taraf ek hi nazaaraa thaa

hamaaraa sher bhi lauh-e-tilism hai shaayad
har ek rukh se hamein be-naqaab kartaa hai

gham kaa suraj to Dubtaa hi nahin
dhuup hi dhuup hai kidhar jaaein

shahr bhar ke aainon par khaak Daali jaaegi
aaj phir sachchaai ki surat chhupaa li jaaegi

tilism toD diyaa ik sharir bachche ne
miraa vajud udaasi kaa istiaaraa thaa

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

shabistaan-dar-shabistaan zulmaton ki ek yurish hai
har ik daaman se lipTaa hai laraztaa haanptaa suraj