gham kaa suraj to Dubtaa hi nahin — Sarfraz Danish

chand lamhe ko tu khvaabon mein bhi aa kar jhaank le
zindagi tujh se mile kitne zamaane ho gae

ham apne jalte hue ghar ko kaise ro lete
hamaare chaaron taraf ek hi nazaaraa thaa

hamaaraa sher bhi lauh-e-tilism hai shaayad
har ek rukh se hamein be-naqaab kartaa hai

shahr bhar ke aainon par khaak Daali jaaegi
aaj phir sachchaai ki surat chhupaa li jaaegi

tilism toD diyaa ik sharir bachche ne
miraa vajud udaasi kaa istiaaraa thaa

raat ki sarhad yaqinan aa gai
jism se saayaa judaa hone lagaa

jab ki pahlu se yaar uThtaa hai
dard be-ikhtiyaar uThtaa hai

ye aansu ponchh lijiye aur muskuraaiye
chaara nahin hai koi bhi rukhsat kiye baghair

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

udaas aankhon se aansu nahin nikalte hain
ye motiyon ki tarah sipiyon mein palte hain