sahar ko saath uDaa le gai sabaa jaise — Sattar Syed

yuun ehtimaam-e-radd-e-sahar kar diyaa gayaa
har raushni ko shahr-badar kar diyaa gayaa

kab ban-baas kaTe is shahar ke logon kaa
qufl khulein kab jaane band makaanon ke

samundaron ko sikhaataa hai kaun tarz-e-khiraam
zamin ki tah mein khazaane kahaan se aate hain

lahu mein phuul khilaane kahaan se aate hain
nae khayaal na jaane kahaan se aate hain

shaayad ab khatm huaa chaahtaa hai ahd-e-sukut
harf-e-eajaaz ki taasir se lab jaagte hain

kaun si baat nai ai dil-e-naakaam hui
shaam se subh hui subh se phir shaam hui

main kisi haal mein maayus nahin ho saktaa
zulmatein laakh hon ummid-e-sahar rakhtaa huun

javaani se ziyaada vaqt-e-piri josh hotaa hai
bhaDaktaa hai charaagh-e-subh jab khaamosh hotaa hai

chuDiyaan kyuun utaar diin tum ne
subhein kitni udaas rahti hain

shaam ko subh se taabir karo tum lekin
aankh vaale to sahar hi ko sahar jaante hain

shafaq kaa rang sukun hai sahar ke chehre par
ki gesu-e-shab-e-gham be-qaraar hai ab tak