jise samjhaa hai tu ai sang-dil mai-khvaariyaan meri — Soz Hoshiarpuri

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri

ek parda saa hai fareb-e-nazar
ye bhi uTThe to dekhnaa kyaa hai

— Soz Hoshiarpuri

piine ko yuun to shaikh bhi tayyaar hain magar
kahte hain shart ye hai girah se na zar khule

— Soz Hoshiarpuri

pas-e-murdan bhi musht-e-khaak mein kaisi ye vahshat hai
uThaa karti hai aandhi ban ke khaak-e-raaegaan meri

— Soz Hoshiarpuri

dil miraa dard ke sivaa kyaa hai
ibtidaa ye to intihaa kyaa hai

— Soz Hoshiarpuri

main ne har takhrib mein dekhi hai ik taamir bhi
meraa miT jaanaa bhi hai himmat-fazaa mere liye

— Soz Hoshiarpuri

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

dasht ki naa-tamaam raahon par
koi saathi hai to shajar tanhaa

— Vijay Sharma

tanhaa rahne mein bhi koi uzr nahin hai
lekin us ke saath hi tanhaa rah saktaa huun

— Zafar Iqbal

jab bhi vo mujh se milaa rone lagaa
aur jab tanhaa huaa rone lagaa

— Zafar Hameedi

aao tum hi karo masihaai
ab bahalti nahin hai tanhaai

— Muneer Niyazi

tum se mile to khud se ziyaada
tum ko akelaa paayaa ham ne

— Irfan Siddiqi