dil miraa dard ke sivaa kyaa hai — Soz Hoshiarpuri

ek parda saa hai fareb-e-nazar
ye bhi uTThe to dekhnaa kyaa hai

pas-e-murdan bhi musht-e-khaak mein kaisi ye vahshat hai
uThaa karti hai aandhi ban ke khaak-e-raaegaan meri

dil-e-haris hi apnaa na ho sakaa qaane
vagarna tere karam mein to kuchh kami na rahi

piine ko yuun to shaikh bhi tayyaar hain magar
kahte hain shart ye hai girah se na zar khule

jise samjhaa hai tu ai sang-dil mai-khvaariyaan meri
tire khalvat-kade mein hain vo shab-bedaariyaan meri

main ne har takhrib mein dekhi hai ik taamir bhi
meraa miT jaanaa bhi hai himmat-fazaa mere liye

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

sab ko bataa diyaa ki main behad udaas huun
itni si baat ko bhi khabar kar diyaa gayaa

fikr-e-fardaa gham-e-imroz gham-e-maut-o-hayaat
aadmi kyaa huaa majmua-e-aalaam huaa

raatein aish-o-ishrat ki din dukh dard musibat ke
aati aati aati hain jaate jaate jaate hain