tum se mile to khud se ziyaada — Irfan Siddiqi

bhuul jaaoge ki rahte the yahaan dusre log
kal phir aabaad kareinge ye makaan dusre log

sham-e-khema koi zanjir nahin ham-safaraan
jis ko jaanaa hai chalaa jaae ijaazat kaisi

us ki aankhein hain ki ik Dubne vaalaa insaan
dusre Dubne vaale ko pukaare jaise

khiraaj maang rahi hai vo shaah-baanu-e-shahr
so ham bhi hadiya-e-dast-e-talab guzaarte hain

hoshiyaari dil-e-naadaan bahut kartaa hai
ranj kam sahtaa hai elaan bahut kartaa hai

nafrat ke khazaane mein to kuchh bhi nahin baaqi
thoDaa saa guzaare ke liye pyaar bachaaein

tez itnaa hi agar chalnaa hai tanhaa jaao tum
baat puuri bhi na hogi aur ghar aa jaaegaa

kuchh to tanhaai ki raaton mein sahaaraa hotaa
tum na hote na sahi zikr tumhaaraa hotaa

kuchh to miltaa hai maza saa shab-e-tanhaai mein
par ye maalum nahin kis se ham-aaghosh huun main

tu ne vahdat ko kar diyaa kasrat
kabhi tanhaa nazar nahin aataa

tanhaai ki ye kaun si manzil hai rafiqo
taa-hadd-e-nazar ek bayaabaan saa kyuun hai

tere siine mein bhi ik daagh hai tanhaai kaa
jaantaa main to kabhi duur na hotaa tujh se